Equo celebra l'actu '+ Claves de Futuro' con atención pal asturianu y la cultura

L'ésitu de '12 claves de futuro' lleva a Equo a celebrar esti sábadu '+ Claves de futuru', con un espaciu pal asturianu y la cultura. Asturies.com va participar nél falando sobre periodismu.

L'actu, previstu pa les 17 hores nel Auditoriu d'Uviéu, va afondar en trés temes cola participación de trés persones d'ámbitos diferentes en cáun d'ellos. El primeru va tratar de derechos, educación, salú y xéneru y nél va participar Paz de Andrés, Nuria Rodríguez y Rubén García González, mentes que'l terceru, previstu pa les 19 hores, va centrase na economía y va contar con Manuel López, Jorge Coque y José Antonio García Cañal y Víctor Rodríguez Rodríguez como ponentes.

Entemedies, Equo dispón un segundu bloque dedicáu a l'asturianu y la cultura, pal que convidó a Asturies.com a falar sobre'l periodismu na llingua del país, que va tar representáu por Fernado de la Fuente. Xunto al direutor d'esti mediu de comunicación van formar parte de la mesa Penélope Miranda, téunica de normalización llingüística que va presentar la importancia de la oficialidá, y Iñigo Varela, de Softastur, que va dedicar la so intervención al software llibre y a les razones que lleven al coleutivu al que pertenez a facer tornes al asturianu. Esti bloque va principiar a les 18 hores.

Azulina Llano, coportavoz d'Equo Asturies, va presentar esti actu que pretende tocar dellos temes mirando hacia'l futuru siguiendo la mesma llinia que '12 Claves de Futuro' celebráu en Xixón el 7 de febreru. Toles intervenciones nun pueden sobrepasar los 15 minutos y van difundise posteriormente pela web de la formación y les redes sociales. Pa finar l'actu, abiertu a tola ciudadanía, va intervenir David Díaz, candidatu d'Equo a les eleiciones a la Xunta Xeneral de mayu.