Enzancos pa les ordenances del asturianu en Xixón

Dempués de meses paralizaes, les ordenances d'usu del asturianu en Xixón paecía que diben esconsoñar cola aprobación del Plan de Normalización. La responsable de la oficina de normalización de Xixón María Xosé Rodríguezcontaba con que l'aprobación del plan fuere un reblagu a l'aprobación de les ordenances d'usu del asturianu nel so conceyu, pero pel momentu pinten bastos.



Según declaró a Asturies.com la conceyala encargada del área de llingua asturiana de Xixón Carmen Rúa "nun hai muncha intención de llevar les ordenances a plenu por parte del grupu socialista" y ello débese a que'l grupu mayoritariu en conceyu nun quier acceder a los compromisos que lleven arreyaes les ordenances.


La conceyala d'educación Carmen Rúa esplicó a Asturies.com que l'alcaldesa Paz Fernández Felgueroso-y manifestare que nun diba dar de pasu unes ordenances que-y abultaba que quedaben fuera del espíritu del pautu de gobiernu IX-PSOE. Según la conceyala d'IX, los puntos que-y resultaben más difíciles de pasar a l'alcaldesa Felgueroso yeren los rellacionaos col usu del asturianu nos documentos alministrativos, pero la refuga de l'alcaldesa elevábase a un planu más xeneral, considerando Felgueroso que'l documentu del plan significaba aceptar implícitamente la oficialidá del asturianu, cosa que nun taba dimpuesta a almitir. Carmen Rúa esplica que'l documentu de les ordenances,que se redactó teniendo por modelos les ordenances yá esistentes n'otros conceyos, citando'l casu concretu de L.lena.

Énte esta situación, el pasáu día 2 de marzu, la conceyala decidió ofrecese a una negociación de les ordenances, pidiendo pa ello que se-y encargare a un técnicu neutral un estudiu de les repercusiones reales de l'aplicación de les ordenances, pero l'alcaldesa negó tala posibilidá, devolviendo'l testu y pidiendo que se ficiere otru nuevu. Ye equí onde entra otra vuelta n'escena la Oficina de la Llingua de Xixón, concretamente'l so conseyu asesor, que según esplicó Carmen Rúa, negóse a facer otru testu, dando por bonu l'esistente.

La situación ta allancada nesti intre, anque l'organismu asesor de la oficina de la llingua, nel que tan presentes sindicatos d'enseñanza, l'ALLA y organizaciones como la Xunta Pola Defensa de la Llingua tien previsto contactar cola alcaldesa. Carmen Rúa, pela so parte, declara que ta dimpuesta a una negociación política del testu, pero reclama pa ello la collaboración de la oficina y del so conseyu asesor como consultores especializaos.