Entrambasauguas de veranu

La revista Entrambasauguas, qu'edita la secretaría de l'Academia de la Llingua Asturiana pa la zona del Navia-Eo, presentó la otra selmana un nuevu exemplar, que fai yá'l 19 d'esta publicación, la más importante en llingua gallego-asturiana. Ente los artículos que s'enxerten nesti númberu de veranu llamen l'atención el qu'escribe Victor Guerra sobre la masonería nel Navia-Eo y el recorríu que fai Rafael Cascudo pela Serra da Bovia. L'últimu Entrambasauguas presenta tamién collaboraciones a mediu camín ente lo lliterario y el relatu históricu, casu del prestosu artículu sobre la emigración a facer les amériques d'Ágata García Castro o tamién allegándose más a lo etnográfico, como la crónica etnográfica, como fai Aurora García Rivas al alcordase de los años qu'echó n'Antigua, en conceyu Santiso d'Abres.

Al preciu d'un euru con 50 céntimos, Entrambasauguas pue mercase en más de venti puntos de venta pel Navia-Eo y nes llibreríes más importantes de Xixón Uviéu y Avilés.