Entréguense n’Estorga los premios del I Certame Lliterariu Astúrica

|

L’asociación Faceira y l’Ayuntamientu d’Estorga entreguen el sábadu na capital maragata los premios del I Certame Lliterariu Astúrica. Los asturianos Inaciu Galán, Naomi Suárez e Irma González-Quevedo, ente los gallardonaos.

Galán y Suárez algamaron el segundu y tercer puestu, de manera respeutiva, na categoría de prosa, que ganó la zamorana María José Zurrón con ‘Llobu’. El xixonés, pela so parte, presentó a concursu’l rellatu ‘Cartes nel horru’, y la polesa, ‘El conciertu’. Mentes, González-Quevedo, uviedina con venceyos nel Altu Sil, llevó’l tercer premiu en poesía con 'Escalones d'amor', estaya na que’l primeru quedó ermu, siendo'l segundu pa Thierry Alves, autor residente en Francia pero natural de Miranda de l Douro, con 'Al reinu maravellozu'.

Esti certame, abiertu a tol dominiu llingüísticu asturlleonés, nació col oxetivu de contribuyir a la divulgación y dignificación del lleonés y tien una recompensa de 200 euros pal primer premiu; de 100, pal segundu; y de 50, pal terceru. La entrega de gallardones va tener llugar mañana, a les 19 hores, na sala Ergástula, actu nel que van tar presentes Mercedes González Rojo, conceyala de Cultura d’Estorga; los miembros del xuráu Fernando Álvarez Balbuena, Héctor García Gil y José Alfredo Hernández Rodriguez; y Ricardo Chao y Abel Aparicio, secretariu y vicepresidente de l'Asociación pola Cultura Llionesa Faceira, de manera respeutiva. Pa zarrar, va actuar el grupu de folk Tarna.

 

Contador Estadistiques