Entréguense los XXX Premios Andrés Solar en Xixón

'Reciella. Families pol Asturianu' y la CONCAPA van recibir esti sábadu el Pegollu y el Madreñazu, de manera respeutiva, de los XXX Premios Andrés Solar. Va ser a les 19.30 en Xixón.

El Pegollu, el que correspuende al que “rescamplara pol so llabor en defensa o promoción del asturianu”, foi pa ‘Reciella. Families pol Asturianu’, coleutivu de padres nacíu nel 2012 col enfotu de promocionar l’asturianu nos primeros años de vida de neños y neñes. Mentes, el el Madreñazu, destináu a les persones o entidaes que destacaren “pol so llabor negativu pa cola llingua asturiana”, foi pa la Confederación Católica Nacional de Padres de Familia y Padres de Alumnos (CONCAPA), en concreto pa la so representante nel país, Sandra Ruiz, “qu’a lo llargo d’esti añu vien atacando sistemáticamente la presencia de la llingua asturiana nel sistema educativu, y avalando y defendiendo les práctiques de determinaos centros educativos pa burllar la llei y nun ufiertar l’asignatura”.

L'actu va celebrase a les 19.30 hores nel patiu del Centru Cultural Antiguu Institutu y va contar cola actuación musical de Xulio Ramos, que tocara nos primeros Andrés Solar, nel añu 1985. Nesta ocasión va tar acompañáu por Emilio Ribera.