Entamen les xornaes de lliteratura de l'Academia de la Llingua

L'Academia de la Llingua Asturiana celebra dende güei llunes y hasta esti miércoles 8 de payares, el II Conceyu Internacional de Lliteratura Asturiana. Les conferencies y comunicaciones del certame van lleese nel Salón d'Actos de la Facultá de Filoloxía de la Universidá d'Uviéu, darréu del actu inaugural que va facese esta tarde nel Salón d'Actos del Campus d'Humanidaes de la Universidá a les 17:00h y que va tener de protagonista al filólogu Xosé Lluis García Arias, que va falar sobre "llingua y lliteratura" contando dende les 18:30h cola actuación musical del grupu folk Corquiéu.

El Conceyu Internacional garra'l testigu de les tradicionales Xornaes Internacionales d'Estudiu, y nelli van participar especialistes españoles y estranxeros. El programa enteru pue consultase na web de l'ALLA, que va dar tamién diplomes acreditativos d'asistencia a les persones interesaes.