Entamen les oposiciones al cuerpu docente d'Asturies

Miles d'opositores entamen güei les oposiciones al Cuerpu Docente d'Asturies, una ufierta qu'ente toles especialidaes de FP y Secundaria allégase a les 120 places. El sindicatu d'enseñanza SUATEA denunció que l'entamu de les posiciones ta marcáu pola desinformación pa los que se presenten a los exercicios y pola falta de consideranza de l'alministración pa con ellos.

SUATEA asegura qu'Asturias ye una de les comunidaes autónomes "que peor trata a quien se presenta a estes oposiciones" afitando la so denuncia en qu'ayeri, a 24 hores del entamu de les prebes, nun se dispusiere de la información imprescindible pa presentase a les mesmes. La central sindical d'enseñanza nun s'esplica como "la Conseyería d'Educación que presume de tar a la última en Tecnoloxíes de la Información nun apurre na so web la información precisa sobre les decisiones de los tribunales d'oposición, dándose'l casu de que dellos tribunales decidieron camudar l'orde de les prebes previstes, dalgo que pue "garrar despreveníos" a munchos opositores. SUATEA llamenta qu'Asturies sía diferente a les demás comunidaes y que los nuestros opositores tengan que "buscase la vida" pa saber qué preba va ser la primera y qué materiales han aportar.