Entamen les campañes de normalización con vistes al nuevu cursu escolar

Agostu ta dando les boquiaes y el cursu escolar ta pa entamar d'equí en pocos díes. Ente ello, la Oficina de Política Llingüística del Principáu va entamar la segunda parte de la campaña al favor de la matriculación n'asturianu que yá desarrollare na primer fase del calandariu de matriculación escolar a primeros del branu.

Trátase d'apurar al másimu les posibilidaes de l'asignatura d'asturianu, anque con too y con ello, y a falta de conocese les cifres finales, el mesmu director de Política llingüística adelanta qu'esta campaña va ser más curtia d'oxetivos que l'anterior, en cuantes que la matriculación de setiembre siempre ye de menosvolume que l'anterior.

Sicasí, la matriculación n'asignatura d'asturianu nun ye la única prioridá de les campañes de normalización empobinaes al ámbitu escolar, y asina la Oficina de la llingua de Xixón tien en preparación una axenda escolar n'asturianu que va distribuyir ente los estudiantes de secundaria del conceyu.