Entama'l debate pa la reforma del Estatutu

La ponencia estatutaria de la Xunta Xeneral del Principáu que va tratar la ellaboración d'un testu pa la reforma del Estatutu d'Autonomía del Principáu d'Asturies va constituyise formalmente a les 12 del mediudía na Sala Argüelles del palaciu de la cai Fruela d'Uviéu, según s'informó dende'l Parlamentu asturianu.

Los representantes de los grupos parlamentarios (PSOE, PP y IX/BA/LV) na ponencia estatutaria que va abordar la ellaboración del nuevu testu pa la reforma del Estatutu d'Autonomía d'Asturies van ser, pol Grupu Parlamentariu Socialista, Javier Fernández Fernández, Fernando Lastra Valdés y Elena Díaz Palacios, pol Grupu Parlamentariu Popular Ovidio Sánchez Díaz, Joaquín Aréstegui Artime y Reinerio Álvarez Saavedra, y p'acabar los diputaos designaos pol Grupu Parlamentariu d'IX-BA-LV van ser Jesús Iglesias Fernández, Noemí Martín González y Francisco Javier García Valledor.

Con motivu del empiezu del debate sobre la reforma estatutaria, la organización Xunta pola Defensa de la Llingua Asturiana, que pide que l'estatutu reconoza la oficialidá del asturianu dio anuncia de la convocatoria d'una concentración col lema "Na Reforma l'Estatutu, L'Asturianu Llingua Oficial" que va facese a les 11:30 a la puerta de la Xunta Xeneral.