Entama’l cursu en La Quintana

La Escuela de Música Tradicional La Quintana de Xixón, un proyectu independiente d'enseñanza qu'echó a andar nel 1998, entamó ayeri les clases nel so octavu añu d'actividá.

L´Asociación Cultural Retueyu, alma mater del proyectu de La Quintana, ye la responsable de qu'ayeri echare a andar esti cursu nuevu, pal qu'entovía ta abierta la matrícula. Dende la so sede na Escuela Pública Rei Pelayo de la Avenida de la Constitución de Xixón, La Quintana pon clas de dellos instrumentos amás d'enseñar folclor y llinguaxe musical.

El métodu de la escuela básase nes clases práctiques que s'imparten individualmente a dellos niveles d'especialización, enxertándose cada alumnu nel nivel que-y correspuenda acordies colos sos conocimientos previos. D'otra manera, delles clases faense conxuntamente ente alumnos d'instrumentos distintos col envís d'afalar les aptitúes pa tocar en conxuntu.


Los horarios de la Escuela son les tardes de los martes, miércoles y xueves nes especialidaes de Gaita, Tambor, Zanfona, Vigulín, Bandurria, Xiblata travesera, Curdion y Asturianada. Los profesores que imparten les clases son músicos perconocíos de la escena musical asturiana, formando toos ellos parte de grupos con una llarga trayectoria como Xuan Nel Esposito (curdión) y Diego Pangua (gaiteru), de Felpeyu, Daniel Garcia de la Cuesta (vigulin y bandurria) de LLiberdón o David Varela (percusión) y Merce Santos (zanfona) de La Bandina.


Pa más información sobre les actividaes de la escuela, que tien abierta la matrícula, pue llamase a los númberos de teléfonu 984 19 81 15 - 616 13 48 95 (Javier G. Lueje) o al 985 16 25 84 (Daniel García de la Cuesta).