Entama l'aplicación de la tercer dosis de la vacuna en centros de mayores

|
Vacunación a persona mayor

Les primeres punxéronse en La Mesta de Pumarín. Esti miércoles rexistráronse 10 casos nuevos de COVID-19 nuna xornada ensin finaos.

El Serviciu de Salú del Principáu d'Asturies (SESPA) entamó esta mañana cola puesta de la tercer dosis de la vacuna. Ésta namái va alministrase en mayores usuarios de centros sociosanitarios, unos 14.000 nel país, y n'inmunodeprimíos, cerca de 4.000.

Como asocedió'l 27 d'avientu cola puesta de la primer dosis, la residencia xixonesa La Mesta de Pumarín foi'l llugar nel qu'arrancó la campaña. Ésta va allargase nes selmanes próximes p'alministrar un refuerzu col que garantizar la inmunidá contra la COVID-19 a la población más vulnerable.

Mesma cantidá de contaxos que'l martes

A falta de la espublización de los datos oficiales de la pandemia, la Conseyería de Salú informó de la detección ayeri de 10 casos nuevos. Ye la mesma cantidá que'l martes, anque con una tasa de positividá daqué mayor: 0,95 por cientu por un 0,65.

A 7 díes esti porcentaxe yera'l martes del 0,98 por cientu –ayeri asitióse nel 0,93 por cientu–. Ye la primer vegada que baxa del 1 por cientu en más d'un añu.

Nun hebo que llamentar muertes na xornada, polo que'l total de finaos nel andanciu sigue en 2.068. Caltiénse tamién el númberu d'ingresaos na UCI, 11, mentes qu'en planta con confirmación o sospecha de COVID-19 aumentó en 2 hasta los 22.

Segunda selmana ensin biltos nuevos

Asturies informó al Ministeriu de Sanidá de la esistencia de 2 biltos activos nel periodu del 13 al 19 de setiembre, 1 menos que la selmana pasada, con un total de 13 casos. Nun se detectó nengún brotu nuevu nestos 7 díes, al igual que la selmana pasada.

Contador Estadistiques