Entama la negociación ente FSA y IX-BA-LV pa repitir gobiernu

La FSA- PSOE y IX-BA-LV van tener esti llunes el so primer alcuentru pa tratar la repitición del pautu de gobiernu ente dambes formaciones. Les dos partes lleguen a la mesa de negociación con un panorama asemeyáu al del 2003 no tocante a repartu de representación, anque'l PSOE tien un escañu menos que n'aquella ocasión y IX-BA-LV caltién los sos cuatro escaños anque dempués de sufrir un baxón de votos importante.

La negociación entama con bona disposición peles partes dempués de llograse la selmana pasada un alcuerdu pa que nos conceyos d'Asturies en que la fuerza más votada d'ente les dos precise del sofitu de la otra pa gobernar cuente col votu favorable de la otra na sesión d'investidura. Acordies con distintes informaciones apaecíes a lo llargo del fin de selmana, IX-BA-LV enfótase en poder pasar de dos a trés conseyeríes en casu de repitise alcuerdu de gobiernu, pudiendo ser una de les que vaya pidir la coalición que lidera Jesús Iglesias la de Cultura, que llevó hasta agora pal PSOE Ana Rosa Migoya, tamién portavoz de Gobiernu, y que foi una de les que más presupuestu tuvieron na pasada llexislatura. IX-BA-LV caltendría la cartera de Vivienda y Bienestar Social y pidiría gobernar la ordenación del territoriu, qu'entienden que ye un complementu imprescindible pa poder exercer les polítiques de vivienda.