'Engarradiella' y 'Cigarreres', producciones asturianes na XI MUSOC

|
Cartelos 'Engarradiella' y 'Cigarreres'

Xixón va acoyer la proyeición d'estos dos documentales nesti ciclu de cine centráu nos derechos humanos que programa actividaes en diez conceyos del país hasta'l día 27.

Yá ta en marcha la IX Muestra de Cine Social y Derechos Humanos de Asturies (MUSOC), que nesta edición estrena dos producciones asturianes. Son 'Engarradiella' y 'Cigarreres', nos que la llingua asturiana tien presencia.

La primera cinta cuenta ye una trabayu d'El Holandés Errante dirixíu por Daniel Lovi que tien la so base nel CD 'Engarradiella' de versiones de punk, rock y hardcore con temática LGTBIQ+ tornaes al asturianu y al gallego-asturiano por grupos del país baxo'l lema 'Sal del armariu, entra nel pogu'. El documental busca mostrar "cómo la música y la escena punk, magar ser un movimiento de reivindicación de derechos, siempre tuvo un gran problema d'homofobia y ataque hacia les realidaes LGTBIQ+, dende les lletres de dalgunos cantares o inclusive coles actitúes de dalgunos grupos referentes na historia d'esti xéneru musical".

Miembros de Delagua, Desakato, Desaniciu, Escuela de Odio, Fe de Ratas, Infección, La Morgue y Sartenazo Cerebral participen nesta producción que se va proyeutar el miércoles, a les 19.30 hores, na Escuela de Comercio dientro de la seición 'Tránsitos' de MUSOC cola collaboración del coleutivu Manflorites.

160 años d'historia

Pablo A. Quiroga y Alejandro Nafría ponen el focu nes trabayadores de la Fábrica de Tabacos de Cimavilla en 'Cigarreres', nome coles que se conocía en Xixón a estes "herederes d'una tradición matriarcal que perduró hasta'l pieslle nel 2002". La cinta d'Algamar Producciones y Aición en Rede Asturies, organizadora del MUSOC, "esplora hasta qué puntu esta fábrica" con 160 años de vida "tuvo venceyada a la sociedá xixonesa".

La so proyeición va celebrase'l sábadu 21 a les 19.30 hores nel Centru Municipal Integráu Pumarín-Xixón. Collaboren Aición en Rede Asturies, l'Atenéu Obreru de Xixón y el Festival Internacional de Cine de Gijón/Xixón.

Internacional

Una cuidada escoyeta de películes premiaes en dellos festivales de cine a nivel internacional conformen el programa de MUSOC, qu'apuerta a Xixón, Avilés, Uviéu, Castrillón, Llangréu, Llanes, Siero, Cangues d'Onís, Villaviciosa y A Caridá con cintes independientes, alternatives y personales de ficción y non ficción, munches nunca proyeutaes n'Asturies. L'oxetivu d'esta iniciativa ye crear un "espaciu d'alcuentru ente'l cine, l'activismu social y el pensamientu críticu, que busca afondar nel conocimientu de los derechos humanos y la cultura de paz".

 

 

Contador Estadistiques