ENDESA propón dos térmiques más en Mieres y Aboño

La riestra de proyectos que les grandes empreses eléctriques cuenten con asitiar n'Asturies nun dexa de crecer. A los proyectos yá existentes tan acabante d'amestase dos grupos más de ciclu combináu a gas qu'abandera la empresa ENDESA.

Ún d'ellos diría pa Mieres, allugándose al llau de la central térmica esperimental de La Perea, na qu'Hunosa quema los restos de les antigües escombreres de les mines, y de fechu, cuéntase con que la empresa minera pública participe nel proyectu pa esti grupu d 450 mw. El segundu grupu, con una potencia de 860 megawatios, asitiaríase ente Xixón y Carreño, n'Aboño, al llau de les dos centrales actuales d'Hidrocantábrico, empresa que tamién ta plantegando un tercer grupu térmicu nel llugar. El grupu d'Aboño, según lu propón Endesa, va ser ún de los de mayor potencia de toa Asturies, y ello ye qu'ente los dos proyectos de la empresa sumen 1.260 mw, lo qu'equival aproximadamente a la metada de tola potencia instalada qu'hai agora mesmo n'Asturies. Grupos ecoloxistes llevaben tiempu alvirtiendo de l intención d'Endesa de proponer proyectos p'Aboño, pero la entrada de la empresa eléctrica a trabayar a comuña con Hunosa en Mieres foi una novedá que sescudió l'actualidá a últimos del mes d'avientu, anque les primeres anuncies falaben d'una central de carbón en cuenta d'una de gas, factor que xustificaría la entrada d'Hunosa na empresa, que dirixentes sindicales defendieron públicamente.

Con estos dos proyectos, yá remitíos al Ministeriu de Mediu Ambiente, la propuesta global de construcción de centrales térmiques n'Asturies llega yá a los 15 grupos a ciclu combináu, asitiaos n'ocho llugares distintos del país. Con ellos, Asturies, que yá esporta cerca de la metada de la corriente eléctrica que produz, triplicaría la so capacidá de xeneración. Otramiente, Asturies tien yá sobre'l 10% de los cerca de 150 proyectos de centrales térmiques que tan enriba de les meses de les estremaes comunidaes autónomes del estáu.