Encierru sindical en Sanidá

Dende les 10 d'esta mañana, delegaos sindicales de la estaya de CC.OO. de Sanidá y del sindicatu de sanidá SAE tienen tomada la Dirección Provincial del Serviciu de Salú del Principáu d'Asturies en reivindicación de que s'abra la Mesa Sectorial de Sanidá, que lleva ensin convocase dende que se constituyó l'actual gobiernu autonómicu cuando la llei apauta que lo faiga lo menos una vegada al añu.

El secretariu xeneral de la Federación Asturiana de Sanidá de CCOO, José Antonio Gómez Parra, y María José Fernández, del SAE dieron una rueda de prensa dende un ventanu del hospital pa esplicar que van aguantar l'encierru hasta que s'atiendan les sos reivindicaciones, que pasen por igualar la xornada llaboral de los trabayadores del SESPA colos del restu de l'alministración asturiana y porque los trabayadores puedan disponer llibremente de los díes de vacaciones. En materia económico, los sindicatos denunciaron que l'alministración nun dio empréstamos a los emplegaos, como mandaba l'alcuerdu de la mesa, y entrúguense au foron a parar los 10,5 millones d'euros que taben acutaos pa incentivos. Los representantes sindicales tamién foron duros coles polítiques formatives y pa cola situación d'abandonu de los centros hospitalarios