Elecciones en Croacia

El presidente de Croacia, Stejpan Mesic ganó la primer vuelta de les presidenciales croates col 49,03 por cientu de los votos, pero la candidata del gobiernu Jadranka Kosor, que consiguió'l 20,2% del votu, forzó una segunda vuelta que va ser el próximu día 16. La gran sorpresa d'estes elecciones foi Boris Miksic, empresariu estadounidense d'orixe croata que quedó terceru col 17,80% del votu.

El resultáu de les elecciones presidenciales de la República Croata, cuartes dende la independencia del estáu croata nel añu 1991, demuestra la estraña composición del mapa políticu croata. Asina, mientres Stepjan Mesic, del Partíu del Pueblu Croata (HPS) ye la opción de los croates de centru-izquierda y de minoríes como los musulmanes de Croacia, mientres que la candidata de los sectores más conservadores, Jadranka Kosor, pasó de ser afiliada del Partíu Comunista de Yugoslavia a dirixir la formación política nacionalista croata Unión Democrática Croata (HDZ) partíu fundáu pol desapaecíu líder de la independencia croata y presidente autoritariu Franjo Tudjman, anque se declara partidaria de la entrada na UE y asela muncho'l tradicional discursu nacionalista del HDZ, centrando la campaña n'atención a los veteranos de guerra. Los términos de la entrada de Croacia na UE y la entrega a los tribunales de los criminales de guerra polos qu'esiste demanda de La Haya son dos de los asuntos más importantes a los que va tener qu'enfrentase'l nuevu presidente croata, anque les sos competencies son muncho menos importantes que les del cargu de Primer Ministru

La ultraderecha, que consiguió en conxuntu un apoyu significativu, anque estremada en munches opciones, gastó un discursu na raya de la llegalidá. Asina Ante Kovacevic falaba nos sos mitinos de poner "otru Ante Pavelic" al frente del país en referencia al líder nazi croata de la II Guerra mundial y Ljubo Cesic dicía de nomar al criminal de guerra Ante Gotovina xefe del exércitu.

Dientro yá de l'anécdota, munchos aspirantes a la presidencia dieron una imaxe poco seria, con candidatos como'l drechista Slaven Letica dando mitinos vistíos de condes del sieglu XIX o col seleccionador de fútbol croata Miroslav Blazevic presentándose -pa sacar un 0,8% de los votos- mientres xuraba que "nel 2011 la UE nun va esistir".