El xulgáu manda la repatriación a Israel de los cuatro fíos d’una avilesina

La titular del xulgáu de violencia de xéneru d'Avilés espublizó un autu pol qu'obliga a a devolver a Israel, país en situación de guerra, a los cuatro fíos de l'avilesina María Amor González, pa reunise col padre, xudíu ultraortodoxu que vive cerca de la raya con Gaza.

L'avilesina María Amor González tuviera los fíos, qu'agora tienen ente 8 y 14 años, con Moshé Elgofi, l'home col que se casare en Miami. Xudíu ultraortodoxu, el maríu convenció a la familia pa dir a vivir a una colonia n'Israel cerca de la raya con Gaza, un llugar onde nin la madre nin los neños s'afayaron y nel que'l clima de violencia y tensión pol enfrentamientu con Palestina acabó cola paciencia de la madre, que volvió a Asturies colos neños nel 2005.

Agora, la xueza avilesina atendió al pidimientu del abogáu del padre, que l'acusó de secuestrar a los neños al dexar el país con ellos ensin causa xustificada. L'autu obliga a llevar a los menores a Israel acordies a un tratáu internacional de devolución de menores, pero l'abogada de la madre alega pela so parte que'l conveniu tien unes cláusules nes que s'apauta que nun pue haber devolución en casu de qu'esta puea llevar arreyáu riesgu físicu o síquicu pa los neños. Anque l'autu obliga a la madre a entregar a los sos fíos pa celebrar darréu un xuiciu, ella afirma que n'entregándolos mandaríenlos pa Israel y que nun diba ser posible'l recuperalos dempués, dalgo que tamién piensa la representante de la comunidá xudía n'Asturies Aida Oceransky. La madre, qu'asegura que los sos fíos quieren más quedar n'Asturies y que tan fechos yá a la vida d'equí, declaró a los medios de comunicación que la ideoloxía ultraortodoxa del padre nun concasa colos valores nos que quier crialos, denunciando con especial gravedá les consecuencies que diba tener pa la so fía mayor la vuelta a Israel, onde afirma que nun se-y permite vestir nin mandase como les demas moces del tiempu d'ella n'Asturies y onde asegura que'l padre diba casala d'equí a la vuelta de dos años, denunciando una situación d'opresión de la muyer qu'ella mesma afirma que sufrió desque llegó a Israel. El Conceyu d'Avilés, al traviés del Centru Asesor de la Muyer, sofita la demanda de la madre.