El xuez da-y la razón a un internauta de Siero

El 27 de payares del añu 2.003 el Xulgáu de Primer Instancia nº 3 de Siero celebró la vista d'un xuiciu que nun tenía precedentes en to estáu. Un internauta asturianu, profesor de derechu del trabayu na Universidá, demandaba a la compañía Wanadoo por incumplimientu de contratu nel serviciu de conexon a internet via ADSL. El denunciante, Iván Antonio Rodríguez, decidiose a demandar a la compañía depués d'una historia kafkiana, anque tampoco nun ye tan raro tener escuchao relatos asemeyaos a la historia del internauta de Siero o hasta sofrir en carne propio los fenómenos que denunciaba.

Depués de más d'un mes dándo-y parte al serviciu d'atención al cliente del servidor de que la velocidá de la conexón que tenía contratada baxaba enforma los díes de per selmana de les 6 y media de la tarde en p'alantre, quedando baxo mínimos hasta les tres de la mañana, mientres que sábados y domingos la baxa de velocidáyera cásique permanente, Iván Antonio Rodríguez decidió poner una demanda, la primera n'Asturies y en tol estáu contra un furnidor de conexón a la rede.

La compañía escusábase pola baxada de velocidá del serviciu diciendo qu'ello yera cosa del titular de la rede, Telefónica, pero'l Xuez entendió que la propaganda de la empresa, na que prometía velocidaes de conexón que dempués nun se cumplíen, yera vinculante col contratu. En consecuencia, el xuez, qu'entiende que Wanadoo fizo propaganda engañoso, espublizó unasentencia qu'obliga a la empresa a la devolución de la metada de les cuotes de conexon y al pagu d'una indemnización de 500 euros. Wanadoo tien agora 5 díes pa recurrir la sentencia.