El visón americanu y el mapache nortiegu, especies invasores que tamién son oxetivu

|
Visón americanu por Peter Trimming

Duplíquense los efeutivos de la campaña asturiana contra l'aviespa asiática.

La Direición Xeneral del Mediu Natural entama per primer vegada actuaciones de control sobre'l visón americanu y el mapache nortiegu, especies invasores que causen un importante impautu negativu sobre la biodiversidá nos ecosistemes nos que s'establecen. La so presencia ta afeutando a les densidaes d'otros carnívoros autóctonos como'l turón, mesmo qu’a potenciales preses como fedegoses, anfibios o pexes, amás de poder tresmitir enfermedaes como l'aleutiana del visón (ADV), aniciada por un parvovirus, el moquiellu y otres patoloxíes al restu de carnívoros qu'habiten nos sotos fluviales, incidiendo de forma direuta sobre la población piscícola.

No que respeuta a l'aviespa asiática, informó que la campaña de retirada y neutralización de niales dobló'l personal pa esti periodu que s'estiende hasta'l 31 d'avientu. El Centru d'Alerta y Control d'Especies Invasores de La Mata, en Grau, va ser l'encargáu de centralizar y monitorizar los trabayos, lo mesmo que de coordinar a tol personal implicáu de Mediu Natural y Planificación Rural, del Serviciu d'Emerxencies del Principáu d'Asturies (Bomberos d'Asturies) y de les entidaes llocales, como son los bomberos municipales, Proteición Civil y empreses contrataes.

La principal novedá de la campaña de retirada de niales d'anguaño va ser l'usu de téuniques y metodoloxíes nueves. Sobre la base de la esperiencia y asesoramientu científico-téunicu, añadiéronse a los métodos d'aplicación de biocida y detonación con cartuchos la neutralización per aciu del llanzamientu de pequeños proyeutiles trescalaos con insecticida, al traviés d'equipos d'aire comprimío, un métodu más rápidu y económicu que resulta menos invasivu y que permitirá atender de forma más eficiente los avisos que se rexistren.

Otra de les especies invasores qu'esmolecen ye'l plumeru de La Pampa, planta que se busca desaniciar polos efeutos negativos pa la biodiversidá y producciones agroalimentaries, asina como polos que tien sobre la salú de les persones. Poro va ponese en marcha una campaña pa la so retirada en zones d'interés natural.

Na imaxe, un visón americanu. Semeya obra de Peter Trimming baxo llicencia CC BY-SA 2.0.

Contador Estadistiques