El vinu de Cangas participa nun proyectu européu

La Comisión de Desarrollu Local y Turismu de Cangas del Narcea ta acabante d'anunciar la entrada del vinu de Cangas nun proyectu internacional nel que participen otres rexones vinícoles d'España, Francia y Portugal.

El proyectu enxértase nun programa européu Interreg III B que baxo'l nome "Rutes inédites del vinu nel Sudoeste d'Europa", pretende promover económicamente les zones vinícoles per aciu del cambiu de práctiques ente tolos territorios, meyorar la calidá de los vinos y promover los atractivos turísticos de les rexones vinícoles.

Aquitania, Midi-Pyrénées o Languedoc-Roussillion, Coimbra, Vale do Ave y dellos territorios de les Baleares, Cantabria y Canaries son los compañeros del Vinu de la Tierra de Cangas nesti proyectu que se marca un plazu de dos años pa promocionar dende una perspectiva turística la cultura del vinu nos territorios vinícoles que menos se conocen nel sudoeste européu. Cangas va ser tamién l'anfitriona que reciba a los demás miembros del proyectu, que va tener ún de los sos oxetivos más inmediatos en facer un plan de viabilidá pa la promoción económica de los vinos.

Otra parte importante del proyectu ye la de promoción turística del patrimoniu etnolóxicu de los centros de producción artesanal. El programa va pagar la edición de guíes y materiales turísticos que van incluyir programes de visita y preba del vinu nes bodegues.