El turismu estranxeru sigue ensin dar el reblagu n'Asturies

Asturies apaez como una de les siete comunidaes autónomes españoles onde’l turismu estranxeru menguó nel mes de xunetu respective al añu 2005, acordies cola última encuesta de Movimientos Turísticos na Frontera del Ministeriu d’Industria, que tamién conseña qu’Asturies tuvo nos siete primeros meses del añu’l mesmu númberu de visitantes estranxeros que nel mesmu periodu del 2005. Con 32.941 visitantes en xunetu (el 0,4% del total español) y 110.362 na suma de los primeros 7 meses del añu, el turismu estranxeru n’Asturies presenta cifres asemeyaes a les del 2005 nun contestu nel que les demás comunidaes de la costa cantábrica, inxertes na marca turística de la “España verde” sí meyoraron resultaos respective al 2005, rescamplando Euskadi, col 14,2% de xuba sobre’l 2005 y Galicia col 6, 9%.