El TSXA dexa en suspenso la Educación pa la Ciudadanía

El conseyeru d'Educación y Ciencia, José Luis Iglesias Riopedre, aseguró que, dende la Conseyería d'Eduación, van ponese tolos medios pa tentar de que la sala lo Contencioso Alministrativo del Tribunal Superior de Xusticia d'Asturies camude la so decisión de suspender la obligatoriedá de les clases de l'asignatura d'Educación pa la Ciudadanía pa los alumnos que se declararon "oxetores de conciencia" énte l'asignatura acordies a los recursos presentaos por 38 families en toa Asturies énte'l TSXA.

Fontes del Foru de la Familia confirmaron a l'axencia Europa Press que el Tribunal suspendiera provisionalmente la obligatoriedá de dir a les clases d'Ecuación pa la Ciudadanía (EpC) d'aquellos escolares que plantegaron oxeciones. Na primer resolución del TSXA, desestimábase la oxeción y establecíase la obligación de recibir la clas.
Énte esti asuntu, Riopedre aseguró que ye un tema "importante y grave" como pa presta-y una atención especial. Riopedre espresó, sicasí, "respetu total" pola decisión xudicial, "independientemente del cuál seya'l nuesu análisis". El conseyeru d'Educación sorrayó que la sala de lo Contencioso Alministrativo "nun entra nel fondu de la cuestión" y aseguró que la suspensión provisional daña'l derechu d'educación de los menores. "Nun podemos olvidar qu'en Cataluña'l Tribunal Superior entró nel fondu de la cuestión y dictó sentencia desfavoratible", dixo.

Pa Riopedre esta resolución causa un dañu "mui grave" al derechu que tien l'alministración de regular les materies y conteníos del sistema educativu asturianu, respetando l'obligáu cumplimientu de la Llei Orgánica d'Educación y los correspondientes Decretos d'Enseñances Mínimes. "Nel casu que mos ocupa, Asturies caltuvo'l testu íntegru ensin camudar nin una coma del decretu d'enseñances mínimes".

De la mesma manera, Riopedre aseguró que solicitó al Serviciu Xurídicu del Principáu la presentación del correspondiente recursu de súplica ante la sala de lo Contecioso Alministrativo nel plazu prescritu. Si la resolución fuera desfavoratible, el Conseyeru anunció que se diba actuar en coordinación col Ministeriu d'Eduación y ciencia pa inteponer el recursu correspondiente. "El fondu de la cuestió ye dalgo qu'ataca a la Llei Orgánica d'Educación y al Decretu d'Enseñances Mínimes", anunció'l Conseyeru. "Hai que tener en cuenta'l derechu d'educación de los menores, tenemos derechu a nun tar d'alcuerdu y nun lo tamos", concluyó.

Pela so parte, el presidente d'Asturies, Vicente Álvarez Areces, declaró que los alumnos asturianos "tienen de recibir" Eduación pa la Ciudadanía (EpC) tal y como lo marca la llei aprobada pol Congresu. En declaraciones a los medios, el presidente asturianu manifestó entender que la suspensión provisional dictada pol TSXA, nun entra nel "problema de fondu". Pal presidente del Principáu, l'asignatura ye una materia incluyida nel currículum escolar, y "poro" una asignatura d'obligáu cumplimientu. "Nós caltenemos la postura del Ministeriu d'Eduación y Ciencia que ye la de dar la materia", declaró'l presidente asturianu. El presidente del Principáu manifestó que'l so executivu ye "respetuosu" cola llibertá de pensamientu de les families que s'oponen a que los sos fíos vayan a les clases d'EpC. "Pero hai que recordar que tolos alumnos tienen derechu a recibir la mesma educación", afirmó'l máximu responsable del Gobiernu autonómicu.