El tratamientu a la oficialidá en prensa coles primeres negociaciones: el 69 por cientu de los conteníos yera contrariu

|
Claudia Elena Menéndez y Inaciu Galán

Del 1 d’ochobre al 31 d’avientu del 2021, los meses nos que la oficialidá y la reforma del Estatutu Autonomía taben enriba de la mesa, 50 de les 72 opiniones espublizaes na prensa escrita asturiana posicionábense en contra. Son los datos d’una investigación de Claudia Elena Menéndez y Inaciu Galán que se presentó esti xueves nun congresu del grupu d'investigación (Otra)Iberia de la polaca Uniwersytet Warszawski.

Estos datos confirmen que’l 69,44 por cientu de los conteníos asoleyaos (2 de cada 3) en 91 páxines por estos medios de comunicación nesti periodu qu’anticipó l’apertura formal de les negociaciones celebraes en xineru ente FSA, Podemos, IX y Foro, ensin alcuerdu final, yera contrariu a la reconocencia de los derechos de los falantes d’asturianu y gallego-asturiano n’Asturies. “Ente los artículos analizaos atópase un argumentariu característicu, más o menos desarrolláu, de la ideoloxía del españolismu llingüísticu, usando’l glotónimu ‘bable’, un tratamientu de llingua estinguida o l’usu d’un llinguaxe bélicu, ente otros, como la supuesta imposición “d’una llingua inventada”, asina como la negación de la entidá propia del asturianu como un sistema llingüísticu independiente, complexu y completu como vía pa xustificar la so oposición a la oficialidá y normalización”, espliquen los autores.

La conclusión principal de la investigación ye que “los testos estudiaos fáense ecu de la ideoloxía del españolismu llingüísticu al traviés de toa una riestra de tópicos y falacies bien detectables y coinciden en presentar la llingua asturiana como una “llingua inútil”, que supón gastos económicos y que nun merez la pena protexer y promocionar”. Amás rescamplen que “‘El Comercio’ toma partíu por una postura concreta al dar voz d’una manera tan descompensada a les opiniones contraries al asturianu, frente a les opiniones favorables, con una sobrerrepresentación de les voces detractores, yá que ye conocío polos autores que munchos testos unviaos nesos díes a favor del asturianu nun tuvieron espaciu”.

La doctora y profesora na Universidá d’Uviéu punxo la ponencia 'Xuicios y prexuicios sobre la oficialidá del asturianu na prensa llocal (2021)', a partir de la investigación fecha a comuña col doctor y miembru de númberu de l’Academia de la Llingua Asturiana (ALLA), esta mañana nel V Congresu Internacional 'Redefiniendu los Márxenes dende una Península Pluricultural: Variación Llingüística y Ideoloxía' que se ta celebrando güei y mañana cola organización del Instytut Studiów Iberyjskich i Iberoamerykańskich de la universidá de la capital polaca con conferencies tamién sobre'l mirandés.

Nes imáxenes, Menéndez y Galán la selmana pasada nes XL Xornaes Internacionales d’Estudiu qu'entama l'ALLA.

Contador Estadistiques