El Trasno defende 'Volviche' nel Liet International d'Oldenburg

La Banda Gaitas El Trasno va defender el cantar en gallego-asturiano 'Volviche' esti vienres nel X Liet Internacional. El certame celébrase na población baxa-saxona d'Oldenburg.

Cola única ayuda económica del Conceyu de Cuaña, l'agrupación ganador del VIII Premiu al Meyor Cantar fixo un importante esfuerciu pa desplazase a Alemaña cola intención de trayer per primer vegada a Asturies el trunfu nel festival européu de cantares en llingües minorizaes. El Trasno presentará una espectacular puesta n'escena nel teatru Kulturetage, escenariu nel que tamién van actuar Adnoz (bretón, Breizh), Aila-Duo (sami, Laponia); Bandalheira (mindericu, Portugal), Bruno Rummler (frisiu, Fryslân), Forefingers Up!-A New Balentia’s Joint (sardu, Sardigna), Marina Sadova (mari, República de Mari-El); Martina Iori (lladín, Trentino-Sudtirol), Willie Campbell (gaélicu, Alba), Gwilym Bowen Rhys (galés, Cymru) y los llocales The Paintbox (baxosaxón).

Les actuaciones, que principien a les 19.30 hores, van poder siguise en direuto nesti enllaz.