El Texu de La Collá recibe homenaxe esti sábadu

La Tertulia Cultural El Garrapiellu va celebrar esti sábadu 30 de xunu a partir de les 11:30 hores, la "Ceremonia - Xuntanza del Texu" que va celebrase nel Texu milenariu de La Collá asitiáu al llau de l'antigua Ilesia de San Pedro de la Collá, en conceyu Siero. La ceremonia, que la Tertulia "El Garrapiellu" entamó a celebrar ya nos años 90, va venceyase nesta ocasión a la demanda de delles asociaciones ecoloxistes y asturianistes que piden la declaración como Patrimoniu de la Humanidá de los texos y los texeos.

Los actos entamen a les 11:30 cola alborada de Gaita. A les 12:00 va oficiase una misa católica n'asturianu a cargu d'un sacerdote del Coleutivu Manuel Fernández de Castro y cantada por Mari Luz Cristóbal Caunedo, Milio Trabanco a la gaita y Pedro Pangua al tambor. Darréu, a les 12:30 va facese un homenaxe-cabudañu a la figura del Gaiteru de Veriña y va baillase la Danza Prima alredor del Texu, cola 'Bendición Bárdica', a cargu del Bardu Errante, personaxe del artista Ánxel Nava. Una xinta popular nel prau del Texu y un conceyu sobre esti árbol con representantes de toles asociaciones esmolecíes pola conservación del texu pa tomar una determinación conxunta pa protexer estos árboles.

L'antigua ilesia de San Pedro de La Collá apaez por primer vegada nel testamentu del rei Ordoñu II, del añu 921. La so historia como monumentu cnoció una interesante evolución que remató llamentablemente na guerra civil, treslladándose tres d'ella'l cultu a la ilesia nueva del pueblu. La Tertulia Cultural El Garrapiellu, xunta los vecinos, solicitaron-yos yá nel añu 1993 a los responsables de la Conseyería de Cultura d'Asturies la igua de la ilesia, y una categoría de protección pal texu, pero l'estrozu siguió énte'l silenciu oficial, perdiéndose nestos años la pila bautismal de la ilesia.