El Tenerife arrolló a un Sporting estráu de baxes

El Sporting perdió en casa dexando pasar ún de los últimos trenes que-y queden pa xubir a primera. Con un equipu estráu de reserves por culpa de les sanciones y les baxes y énte un Tenerife que xugó como un equipu de primera, los asturianos aguantaron hasta'l minutu 78 faciendo sufrir a la grada, pero a la fin cayeron a balón paráu. Los resultaos de la xornada dan pa la esperanza, porque l'ascensu sigue a trés puntos, pero hai que ganar tolos partíos que queden y esperar pol fallu de los demás.

El Sporting llegaba tocáu a esti partíu en casa. Con dos xugadores sancionaos tres del escándalu d'Eibar y con otres importantes faltes, casu de Dorado, referente na defensa asturiana, el Sporting tenía de xugar contra un Tenerife que, anque anda pela parte baxa de la tabla, demostró que tien equipu pa más. Contra ello, Marcelino tuvo de poner una llinia de defensa que nun s'ensayaba dende la pretemporada y que tamién entós perdiere.. precisamente contra'l Tenerife y precisamente por 2 a 0. Con Diego Alegre puestu de defensa izquierdu y Jeffrey Hoogervorst de central, solamente quedaba Sastre de la defensa titular del Sporting. La cosa pintaba mal, y la lesión de Segovia nel minutu 13 acabó de descompensar al equipu, obligando a sacar a un Pablo Álvarez que nun ta nel meyor momentu. Martín Posse encargóse de confirmar los males sportinguistes, llevando munches situaciones de peligru al área.

Ello nun quier dicir que los asturianos tuvieren mancos. L'equipu xixonés atacó siempre que pudo, y controló'l final del primer tiempu, pero Miguel falló dos vegaes énte la meta, rematando con un trallazu a la madera canaria'l primer tiempu. El segundu tiempu entamó con ataque sportinguista, pero yera'l día de la negación. Los asturianos fallaben nos últimos metros y, na so oportunidá más clara, Ismael unviaba'l balón a la grada. Nel últimu cartuchu del ataque sportinguista, la grada pidió penalti por un agarrón a Bilic, pero darréu acabó too. Hidalgo sacó una falta que Corona remató de cabeza poniendo la ventaya canaria en marcador. El Molinón calló y bien de públicu entamó a marchar del estadiu mientres, na desesperación, el Sporting probaba a sacar tola artillería col cambéu de Jeffrey por Cobas. Valió pa poco, porque Jesús Vázquez firmaba nel 98 l'inapelable trunfu del Tenerife.