El Suroccidente pierde a Rosa Cunqueira, un referente cultural

Autora de la primer obra de la variante cunqueira del asturianu, nun recuperó del grave accidente d'autocar que tuvo llugar n'ochobre en Venèsia con 21 muertos y 15 firíos.

Rosa Cunqueira yera una d'eses 15 persones que tuvieron que ser atendíes de la cayida de 15 metros que sufrió'l vehículu dende un pasu eleváu na población de Mestre, amburando y provocando quemadures a la vecina de Trabáu qu'obligaron a hospitalizala n'estáu grave. Dende esi 3 d'ochobre llevaba lluchado pola so vida nun hospital de Pàdoa, l'Azienda Ospedale-Università Padova, pero ayeri la tristura tomaba'l Suroccidente y tol país por una complicación que-y provocó finalmente la muerte.

Queda asina güerfana la tienda-taller La Guarida del Cunqueiru, que llevaba xunto col so fíu Vítor, continuidá d'El Rincón Cunqueiru qu’entamara col so cuñáu Viturino nel 2004, cunqueiru que nos dexaba de sópitu nel 2020. Y tamién el pueblu de Trabáu, el conceyu de Degaña y el d'Ibias, onde nacier nel 1971, y tol mundu de la cultura asturiana.

Rosa Rodríguez González, gallardonada como Muyer Rural d'Asturies nel 2022, yera una gran defensora de la cultura del Suroccidente y de la variante cunquiera del asturianu, que dominaba. Nel 2011, gracies a Roberto González-Quevedo, qu'impartió un cursu de llingua asturiana en Zarréu solicitáu polos vecinos al Conceyu de Degaña, animóse a espublizar ‘Suenos. Versos cunqueiros’, primer llibru espublizáu nesta variante, que l'añu pasáu asoleyó una segunda edición incorporando códigos QR pa que se pudieren sentir los poemes; pa que xente de tol mundu pudiera sentir el cunqueiru.

Dende El Rincón Cunqueiru entamara visites p'amosar la cultura cunqueira, dinamizando'l pueblu, y entamara actividaes como'l CachuFest, un certame con proyeiciones, conciertos, salíes guiaes y talleres. Una cultura y variante que siguirá defendiendo'l so fíu Vítor, que domina'l cunqueiru y “escribe mui bien”, confesaba Rosa na presentación del so poemariu en Xixón nel mes d'agostu.

La familia anunció ayeri nun comunicáu que por deséu de la propia Rosa nun va haber nengún tipu de ceremonia nin veloriu, solicitando intimidá pa la familia nestos momentos. L'equipu que conformamos Asturies.com quier tresmitir el nuesu pésame por esta importante perda pa la cultura asturiana y unviar un fuerte abrazu a toles persones cercanes a Rosa.