El supremu almite un recursu d’Andecha Astur contra l’anulación de les ordenances d’usu del asturianu en Nava

La formación política Andecha Astur dio anuncia esta selmana de la recepción d'una Providencia de la Sala de lo Contencioso - Alministrativo del Tribunal Supremu pola que s'almite el recursu de casación que nel so día interpusiere Andecha Astur contra l'anulación de les Ordenances Municipales sobre Oficialidá de la Llingua en Nava.

Les Ordenances de Nava, qu'aprobare l'Ayuntamientu navetu en fecha yá llonxana como foi'l 8 de xunu de 2001, quedaren anulaes por una sentencia del Tribunal Superior de Xusticia d'Asturies del 3 de Xunu de 2005, cuando'l máximu tribunal asturianu almitió'l recursu contra les ordenances interpuestu pola entós delegada del Gobiernu n'Asturies, la popular Mercedes Fernández. El recursu de la delegada del Gobiernu contra les ordenances navetes foi ún de la riestra de midíes llegales que tomaren ella y el so predecesor nel cargu, Fernando Fernández Noval, contra tolos conceyos que declararen la oficialidá del asturianu o qu'aprobaren, como foi'l casu, midíes de protección y ordenances d'usu de la llingua.


Les Ordenances navetes reconocíen y regulaben los derechos a dirixise al Conceyu y recibir información d'elli n'asturianu, potenciar lo asturiano nes actividaes municipales o respetar los nomes asturianos de les cais y pueblos del conceyu. El documentu comprometía al plenu municipal a ellaborar un Plan Añal de Promoción, Usu, Espardimientu y Enseñancia de la Llingua Asturiana, con calter previu a l'aprobación de los presupuestos municipales.

El recursu d'Andecha Astur pasa agora a la Sección Cuarta del Tribunal Supremu pa que'l ponente lu estudie enantes de que se dicte sentencia. Nel comunicáu en que se da anuncia de l'almisión del recursu, la secretaria xeneral de la organización, Olaya García, manifiesta la so esperanza de que "esta batalla xudicial de Nava se gane finalmente a favor de la oficialidá y d'estes ordenances".