El Sporting resolvió nun cuartu d’hora

L'equipu de Marcelino fizo dos goles nel primer cuartu d'hora al filial del Málaga y echóse a apigazar nel segundu tiempu.

El Sporting resolvió la papeleta col filial del Málaga ensin falta de despeinase. Contra un equipu mozu por demás, los xugadores de Marcelino nun alcontraron oposición, sobremanera dempués de que Borreguero adelantare al equipu asturianu nel minutu 4. Ello foi nel saque d'un corner nel que Calandria tuvo la picardía de retrasá-y el balón a Borreguero, en posición perfecta pa frayar la portería. El gol desarmó a los rapazos del Málaga B, qu'anduvieron desnortiaos tol primer tiempu, sobremanera en defensa. El Sporting ganába-yos la espalda a los andaluces en toles acciones, lo que dio p'abondes ocasiones de llucimientu personal d'Ismael y de Calandria. L'arxentinu enanchó la cuenta pal Sporting nel minutu 16 y el navarru convertió un tercer gol dempués d'un bon control nel área, pero l'árbitriu anuló la xugada por una falta previa que nadie nun vio namás qu'elli.

El Sporting foi baxando'l ritmu según pasaben los minutos, dedicándose namás a controlar al rival, siendo lo más destacao la lesión boba de Samuel. El central de maliayo retorció una pierna al pisar en falso y tien una rotura de frebes nel cuadriceps que nun se sabe lo grave que pueda ser. Pela so parte, el Málaga fizo dalguna xugada guapa, pero'l mayor peligru túvolu con un tiru de Castro dende fuera del área que disvió Roberto na única ocasión que tuvo pa enseñase'l porteru gallegu.

El segundu tiempu foi pa escaecer, sacantes un par de centros envelenaos que mandó Pablo Álvarez dende la banda derecha. Los cambeos nel Sporting, cola entrada de Javi Fuego por Samuel, Pablo Lago por Juan y Arthuro por Calandria nun aportaron nada a un equipu qu'anduvo apigazando y que se dedicó a facer lo xusto o incluso menos que lo imprescindible contra un Málaga B que xugaba con 10 pola doble mariella de Rubén y que podía ser víctima fácil d'una goliada de les qu'anda faltu l'equipu asturianu pa poder meyorar el golaveraxe. Marcelino dende la banda paeció enfadase en dalgún momentu pola actitú pasiva de los d'elli mientres que los visitantes permitiéronse dalguna entrada nel área del Sporting, pero ensin llegar a tener posibilidaes reales de rematar a gol, acabando'l partíu ensin mayor sustancia dempués de que munchos de los 12.000 espectadores qu'asistieron ayeri al molinón abandonaren l'estadiu enantes d'acabar los 90 minutos col convencimientu de que yá nun-yos quedaba más fútbol que ver. Razón nun-yos faltaba.