El Sporting nun atopa puerta y diz alón al suañu del ascensu

|
El Sporting fracasó nel intentu por tornar a Primera tres nun ser quien a marcar en 180 minutos a Las Palmas, que sigue na llucha pol ascensu tres aprovechar dos regalos xixoneses. El Llangréu va decidir la so eliminatoria en Ganzábal.
 
El primer regalu, el del Estadio de Gran Canaria, foi’l definitivu nesti play-off, yá que’l d’ayeri llegó col Sporting a la desesperada y col tiempu casi cumplíu. El gol d’Aranda’l miércoles obligaba a los roxiblancos a marcar y a dexar la puerta a cero si quiería tener opciones reales de pasar a la ronda definitiva, pero nun consiguieron superar a Barbosa, que fixo una gran parada a Lekic nel tramu anicial y tuvo l’ayuda de los palos en dos ocasiones. Tamién la del árbitru, que nun quixo ver una mano d’Ángel na primer parte nun centru de Canella. Sicasí, nin los errores arbitrales continuos que sufrió’l Sporting a lo llargo de la temporada nin la falta d’aciertu a portería nesta eliminatoria son escuses pa una planificación mala d’una plantiya que dio milenta facilidaes a los sos rivales en defensa, como amuesen los 51 tantos recibíos en lliga regular.
 
Si nun hai novedá, pese al 2-0 nel global con Las Palmas –que va lluchar pol ascensu col Córdoba–, Abelardo va continuar l’añu próximu como primer téunicu nun proyeutu que, por obligación económica, va mirar otra vuelta a Mareo. Mozos como Sergio, Barrera, Jony, Pablo Pérez o Álvaro Bustos, bien conocíos pol téunicu xixonés, han de ser los encargaos, xunto con veteranos como Lora o Cases, de liderar el proyeutu roxiblancu pa la temporada 2014-2015. Nesti puntu convien recordar que los meyores momentos del Sporting na so historia foi cuando miró pa la cantera.
 
Ganzábal va tornar a decidir
 
‘Tamos xuntos nestos’ ye’l lema del Llangréu pa esta temporada y la población del conceyu del valle del Nalón va responder el domingu en Ganzábal (18 hores) pa devolver al so equipu a la Segunda División B. Los de Pablo Lago traxeron d’Extremadura un resultáu engañosu de 0-0 –con empate a goles, quedaría elimináu– pero superable en casa énte un bon Mérida AD. El téunicu azulgrana, que pudo contar al final con Nacho Calvillo tres la retirada de la tarxeta recibida frente al Haro, dispuso una táutica defensiva pa salir vivu d’un Romano qu’axuntó a 10.000 persones, ente ellos un centenar de llangreanos.
 
Como nota negativa, ultres llocales frayaron dos llunes del autocar del Llangréu. Pese al incidente, la direutiva asturiana destacó’l bon tratu recibíu por parte del Mérida.
 
 
 
Contador Estadistiques