El Sporting, líder de segunda

El Sporting afitó ayeri n'El Molinón la so candidatura pal ascensu a primera al ganar al Almería, un equipu que namás perdiere ún partíu fuera de casa en tola temporada. L'estadiu de la eria'l Piles vivió un ambiente que nun se recordaba dende'l tiempu yá llonxanu en primera, con más de 17.000 espectadores que llevaron al equipu en cuellu hasta un trunfu que se celebré entovía más precísamente porque tardó.

L'Almería llegó a Xixón como se contaba dispuestu a armar la pesllera y nun dexar entrar a naide. Xugando primero con cuatro defenses y dempués con cinco, l'equipu andaluz namás vio la puerta del Sporting a lo primero, teniendo la única ocasión nel minutu 16, atayada perfechamente por Roberto, que tuvo l'ayuda d'una defensa ensin fallu mandada por Yago. D'entós en p'alantre, el Sporting afogó al rival, desgastando a los sos xugadores nuna demostración de forma física que diz muncho del llabor de los preparadores del equipu asturianu. Con too y con ello, hebo qu'esperar al segundu tiempu pa qu'abriere la caxa del Almería.

Pablo Alvarez primero, con un balón que-y marchó por poco, destapó'l frascu del velenu del Sporting, pero si'l segundu tiempu tuvo nome foi el de Miguel. Un poco gris nel primer tiempu, el futbolista asturianu fartucose a mandar balones al area nel segundu tiempu. Primero apurrió-y una asistencia per alto a Bilic que pudo guapamente acabar en gol, dempués protagonizo'l penalti que'l croata convirtió nel primer tantu y marcó'l segundu tres d'una xugada de llibru con Juan y Dorado. Anque la espulsión por doble mariella de Jaime ayudó enforma a despesllar la defensa del Almería, ello nun quita méritu del llabor del equipu asturianu, que'l llunes tien de xugar contra'l filial del Málaga estráu de baxes por amonestaciones, les más d'elles buscaes, pa poder recuperar a tola plantilla nel importante partíu n'El Molinón contra l'Alavés d'equí a la vuelta de quince díes.