El Sporting, cola cigua

Sporting y Valladolid xugaron ayeri n'el Molinón un partíu que, teóricamente y por historia de los dos equipos, tenía un arrecendor a primera. Sicasí, la posición na tabla de los dos equipos, asitiaos na parte media-baxa de la clasificación, nun da pa munches allegríes, y tampoco nun dio pa grandes emociones ayeri'l xuegu de nengún de los dos equipos, sobremanera'l del conxuntu castellanu. El Valladolid, con tola so condición d'equipu acabante de baxar de primera, fizo un xuegu probetayu ensin buscar la portería de Roberto más que con balonazos que s'averaben dacuando a la posición del arrebatedor asturianu, poniendo Hornos la única ocasión de peligru pal Valladolid en tol primer tiempu. Pela parte asturiana, el Sporting, que tampoco nun tuvo tolo sueltu que debiere, allegóse en dos ocasiones a la portería del Valladolid.

Lo meyor llegó na segunda metada, con un Sporting con más rixu y mandáu por Xuan y por Ismael, un futbolista que pasó de ser de los más criticaos pola afición a tener un papel importantísimu dende va delles selmanes p'acá. D'ellos dos salió la xugada del gol del Sporting, al poné-y Xuan a Ismael un centru que dexaba al delanteru en posición de marcar, y qu'obligaba a la defensa castellana a segar a gadañu la pierna d'Ismael. L'árbitrio, mui atentu al xuegu en tol partíu, pitó un penalti que'l mesmu delanteru navarru convertió con más suerte qu'estilu. El Sporting adelantábase y xugaba los sos meyores minutos, pero diba reculando adulces con vistes a xugar a la defensiva l'últimu cuartu d'hora. Los cambeos de Marcelino, que sacó del campu a los dos meyores futbolistes del partíu, Ismael y Xuan, por Pablo Lago y Bauzá, ayudaron a que l'equipu esmigayare más, viviéndose unos diez minutos finales de preocupación pa l'afición asturiana, anque tampoco nun paecía que'l Valladolid llevare velenu nos sos ataques.

Nel minutu 92, col partíu dando les boquiaes, llegó'l desastre, y foi, otra vuelta, a balón paráu. L'árbitrio pitó una falta directa a más de diez metros del testeru del área del Sporting y Victor pasó'l balón lo xusto pa que Figueredo peinare de cabeza énte un Roberto que quedó varáu. L'equipu xixonés buscó nel últimu ataque que-y dio tiempu a facer el 2-1, pero los asturianos movieron el pelotu con demasiao baruyu. Al final, otru empate pal sacu y la zona de descensu a segunda B a trés puntos.