El Sporting asciende nuna xornada pa la historia

El 7 de xunu del 2015 va ser recordáu pa siempre na historia del sportinguismu. El club roxiblancu ascendió a Primera gracies a un gol del Lugo nel descuentu en Montilivi.

El Sporting necesitaba ganar nel Benito Villamarín por dos goles y un empate del Lugo, equipu que llegaba a Girona colos deberes fechos –nel casu de trunfu gallegu bastaba con ganar en Sevilla–, y los d'Abelardo salieron a pol partíu dende'l primer minutu, consiguiedo el primeru nel 23 nuna bona combinación de Sergio y Luis Hernández que materializó Guerrero. Llueu, na segunda parte, llegaríen los tantos de Jony y Isma López, y toles miraes punxéronse en Montilivi, onde'l Girona ganaba 1-0 por un gol de Sandaza poco enantes del descansu. El Sporting necesitaba un gol de Lugo, que taba apretando al conxuntu catalán, y ésti llego gracies a un cabezazu del arxentín Caballero nel 92.

La llocura españó en Xixón y en media Asturies pese al susto que supunxo un gol bien anuláu al central Lejeune y la suspensión del partíu por parte del colexáu Sánchez Martínez tres recibir el so asistente un botellazu. Sicasí, el murcianu, con Quique Setién yá en rueda de prensa, mandó volver a los equipos pa disputar 40 segundos interminables pa la plantiya y aficionaos del Sporting. Finalmente, el gol nun llegó y el Sporting ascendía a Primera nuna xornada que pasa a la centenaria historia del club roxiblancu.

Tres la resaca de la celebración d'ayeri, güei toca la segunda parte, con un percorríu peles cais de Xixón y alcuentru cola afición na Plaza Mayor. Un autobús va salir a les 18.30 hores d'El Molinón pa garrar l'avenía Castiella, la Costa, Palacio Valdés, Álvarez Garaya, Plaza'l Carmen, Los Moros, Xovellanos y Cabrales.

Otra manera, na segunda eliminatoria de la fase d'ascensu a Segunda División B, el Condal nun pudo sacar un resultá positivu na so visita al Cayón. Los de Noreña perdieron 1-0, con gol de Lavín, y deberán remontar el sábadu nel Alejandro Ortea (18 hores) pa continuar na llucha pol ascensu a la categoría de bronce. El preciu de les entraes ye de 12 euros, 7 pa socios. Los menores de 12 nun paguen y los de 18 han d'abonar 5 euros.