El sector de la sidra recibe con contentu la retirada de la "Llei del Alcohol"

El Gobiernu español decidió ayeri la "interrupción" pel momentu indefinida, de la tramitación del anteproyectu de Llei de midíes sanitaris pa la protección de la salú y la prevención del consumu de bebíes alcohóliques por menores. La Ministra de Sanidá Elena Salgado declaró que la retirada de la llei obedez a un intentu "d'evitar la confrontación partidista y electoral sobre esti particular".

Ye la primera vegada na llexislatura que'l Gobiernu de Zapatero paraliza una iniciativa llegal, una decisión na que pesó muncho la ruptura de negociaciones colos representantes del sector del vinu.

L'Asociación de Llagareros d'Asturies, que tamién pidía la retirada de la Llei, recibió l'anuncia con gran contentu. Pa l'asociación que preside José María Osoro, la retirada de la Llei "va beneficiar al sector de la sidra y al restu de sectores de bebíes de baxa graduación". Osoro calificó la retirada de la llei de "bona noticia pa tolos asturianos" anque esplicó que taba a favor de que se protexere a los menores del consumu d'alcohol.