El secretariu d'organización de la FSA afirma que la llingua nun ye una prioridá nel estatutu

El secretariu d'organización de la Federación Socialista Asturiana Jesús Gutiérrez declaró públicamente nuna entrevista concedida al periódicu de Xixón "El Comercio" que la llingua nun entra nes prioridaes de la so formación política pa la reforma del estatutu.

Entrugáu poles prioridaes de la FSA énte la reforma estatutaria, el miembru de la executiva de los socialistes asturianos entamó la rempuesta en negativo, definiendo lo que nun son prioridaes pa la so formación política: "nin la llingua nin la identidá" esplicando darréu d'ello que los oxetivos de la FSA nesta reforma que pel momentu ta allancada pola negativa del PP a entamala, pasen peles competencies de los puertos, l'aeropuertu y de los ríos, temes que calificó de "primer nivel porque son sumamente importantes pal desarrollu d'Asturies".

Jesús Iglesias, coordinador d'Izquierda Xunida, fuerza asociada a la FSA nel gobiernu asturianu, retrucó a les declaraciones del líder socialista afirmando que ye una falsedá l'apautar una oposición "ente la oficialidá y la xestión de los puertos". Pa Iglesias amás Asturies nun precisa d'una reforma estatutaria pa facese con eses competencies, pa les que namás fadría falta un remocique cenciellu del estatutu actual.