El Reinu Uníu va renovar el so arsenal atómicu

La Cámara de los Comunes británica aprobó ayeri, por mayoría amplia, la propuesta del Gobiernu británicu de renovación del sistema Trident d'armamentu nuclear de disuasión. L'executivu Blair llogró l'aprobación del so proyectu de renovación del arsenal atómicu británicu col sofitu de la oposición conservadora y col votu en contra d'un cientu de diputaos del so mesmu partíu, el llaborista, dalgo que namás asocedió con motivu de l'aprobación de la participación del Reinu Uníu na Guerra d'Irak.

El plan, que va suponer una inversión de cerca de 30.000 millones d'euros,

El sistema Trident ígüenlu una riestra de misiles balísticos intercontinentales de fabricación estadounidense que s'asitien en cuatro submarinos estratéxicos. Con una vida teórica de 30 años, los trident venceríen nel añu 2024. La propuesta del Gobiernu británicu pasaba por amestase a un programa militar de los EEUU qu'espurriría 10 años más la vida de los misiles pero qu'esixe construyir una flota nueva de submarinos.

Voces crítiques de ONGs y movimientos ecoloxistes como Greenpeace aseguren que'l coste real del rearme nuclear británicu va ser más altu del que se diz en público y aseguren que'l plan del executivu Blair esfrónase col Tratáu de Non Proliferación Nuclear, qu'obliga al Reinu Uníu a avanzar camín del desarme. La ilesia anglicana declaróse tamién contraria al rearme, que la población refuga masivamente nes encuestes.