El Real Uviéu va dar la crónica n’asturianu

La tresmisión de testu on line que fai la web oficial del Real Uviéu dando crónica en tiempu real de los sos partíos va redactase n'asturianu pal alcuentru que va enfrentar al equipu col Zalla esti domingu. Amás d'ello, la Web Oficial tamién va inxertar l'asturianu xunto col castellanu nes noticies sobre l'equipu qu'apaecen na páxina y tamién na revista en papel qu'edita l'equipu.

L'alcuerdu p'apostar pol emplegu del asturianu na web y publicaciones oficiales llega dempués de delles reuniones con representantes de la Xunta Pola Defensa de la Llingua a cuenta de los incidentes que se dieron ente'l club y la organización dempués de que militantes de la Xunta intentaren espurrir una pancarta dientro del estadiu Carlos Tartiere a favor del asturianu na TV autonómica. El comunicáu oficial del Real Uviéu diz que la intención del equipu sobre l'asturianu ye la de "collaborar dientro de les sos posibilidaes pa la divulgación del asturianu".