El PSOE pon l'obxetivu nos cuatro diputaos

El secretariu federal de política municipal del PSOE y cabeza de llista al Congresu por Asturies, Alvaro Cuesta, declaró ayeri que l'oxetivu del PSOE n'Asturies pa estes elecciones va ser el d'algamar cuatro diputaos y facer plenu nel senáu, consiguiendo les trés places senatoriales en xuegu'l 14 de marzu. Anguaño, el PSOE cuenta con trés diputaos y ún senador, lo que, si amás se tien en cuenta qu'Asturies escueye nestes elecciones un congresista menos que nes del 2.000 per aciu de la baxada de población, fai del oxetivu del PSOE una meta abondo ambiciosa.

D'otra manera, delles fuerces asturianistes van preparando les sos candidatures. D'una parte, el Partíu Asturianista dio anuncia güei de que va celebrar una Xunta Nacional el prósimu día 20 de la que tien de salir la llista electoral a congresu y senáu, anque la executiva del partíu va proponer como númberu ún pol congresu a la nueva responsable de l'agrupación d'Uviéu, Azucena Castaño Blanco, una desconocida hasta agora nos puestos de salida de les llistes del partíu de Sánchez Vicente que, sacantes sorpresa, va ser la candidata. D'otra parte, Izquierda Asturiana (IAS) dio anuncia de que va presentase por primer vegada en solitario a unes elecciones xenerales, anque ensin concretar entovía quien van ser los sos candidatos.