El PSOE diz que la so postura contraria a la oficialidá "nun ye inamovible"

|

Iniciativa pol Asturianu pidió la oficialidá del asturianu a PSOE y Podemos nun alcuentru pa tratar la so visita a la ONX

Iniciativa pol Asturianu entamó esta selmana los alcuentros con los grupos parllamentarios sobre la so visita a la ONX, con reuniones cola FSA-PSOE y Podemos, y una próxima confirmada con Foro, a la espera de respuesta del restu de formaciones. Nellos apurrió-yos el dossier de la so visita a la ONX y  “recordamos la necesidá d’abrir un procesu de reforma del Estatutu d’Autonomía d’Asturies pa incluyir la oficialidá del asturianu –y del gallego-asturiano nel so ámbitu– y evitar asina esta situación llamentable” comentó Inaciu Galán, el so presidente.

Como pasu previu, Iniciativa pol Asturianu tien la “idea ye que l’asuntu llegue a la Xunta Xeneral y qu’ellí pueda discutise de dalguna manera y sacar alantre una moción o posicionamientu del Parllamentu asturianu” que sirva de puxu al entamu de dichu procesu de reforma del Estatutu.

“Sicasí, entrín y non, esti procesu sigue avanzando, ye necesario frenar los casos de discriminación de los falantes d’asturianu tomando midíes que garanticen la igualdá y la non discriminación en nengún ámbitu por usar l’asturianu, lo que ye posible desendolcando de forma ambiciosa la llexislación actual, que tien por principales testos llegales la Llei d’Usu y Promoción del Asturianu, incumplida de forma sistemática dende la so aprobación en 1998, o la Carta Europea de Llingües Minoritaries, de cumplimientu obligáu n’España dende la so ratificación per parte del estáu en 2001”, añadió Galán. Un Plan que considera que tien que tar “diseñáu y aprobáu enantes de que fine l’añu, porque nun se pue perder más tiempu”.

La postura del PSOE sobre la oficialidá

A entrugues de los periodistes sobre’l conceyu colos socialistes, Galán confesó qu’ésti foi “cordial”, interesándose por tolo que se trató en Suiza, anque remarcando “que la so postura nesti momentu nun yera favorable a la oficialidá, pero que les postures son variables nel tiempu y que les coses nun son inamovibles”. Al respeuto, Iniciativa pol Asturianu treslladó-yos la sorpresa que causa fuera d’Asturies que’l PSOE nun apoye la oficialidá del asturianu, al contrario que fai coles llingües propies n’otros territorios.

“Les instituciones asturianes han tomar mui en serio esta situación, yá que l’atención d’organismos como l’Altu Comisionáu de los Drechos Humanos de la Organización de les Naciones Xuníes demuestra que la cuestión perxudica la imaxe de la democracia española y asturiana, con situaciones más propies d’estaos con sistemes totalitarios, que d’estaos modernos y plurales onde se respeta la diversidá llingüística de la so población”, finó Galán.

Na semeya un momentu del conceyu de la FSA-PSOE con Iniciativa pol Asturianu

Contador Estadistiques