El Principáu presenta una campaña p'afalar la escolarización en llingua asturiana

La Conseyería d'Educación y la Oficina de Política Llingüística presentaron ayeri n'Uviéu los conteníos de la campaña afalando a la matriculación n'asignatura d'asturianu nos centros escolares que'l conseyeru d'educación anunciare que diba facese cuando la selmana de les lletres asturianes.

La campaña,que tien un presupuestu de 30.000 euros (5 millones de pesetes) va desarrollase en dos fases coincidiendo coles dos campañes de matriculación nos centros escolares, la primera agora, hasta'l 26 de mayu, y la segunda nel mes de setiembre.

Xunta los anuncios en prensa escrito cuñes radiofóniques, la campaña cuenta con más de 2.000 carteles y 30.000 folletos que baxo'l lema "Ye nuestro" conviden a matriculase n'asignatura d'asturianu, emponderando los valores d'esta enseñanza como elementu patrimonial y d'identidá y como elementu positivu na formación integral del alumnu. Xunta estos preseos, ta unviándose a tolos centros escolares una carta conxunta firmada pola Conseyera de Cultura y el Conseyeru d'Educación na que se presenten los conteníos y oxetivos de la campaña, que tien l'envís de meyorar les actuales cifres d'escolarización del asturianu

Va ser la primer vegada que se faiga una campaña d'estes característiques, y tamién la primera en que se faiga un desarrollu propiu de la mesma pa la comarca del Navia-Eo, onde quier facese un tratamientu en paralelo al del restu del territoriu. Precisamente esta mañana'l director de la Oficina de Política Llingüística Ramón d'Andrés tuvo presentando los conteníos específicos en gallego-asturianu d'esta campaña en conceyu d'A Veiga, onde van mandase más de 5.000 folletos escritos na fala del Navia-Eo y nos que'l slogan "ye nuestro" pasa a la forma "E noso".