El Principáu prepara una llista de llugares a protexer pa la UE

El Principáu d'Asturies tien una propuesta pa presentar énte la UE con venti llugares que-y abulten a la Conseyería que tienen interés abondu pa ser Llugares d'Interés Comunitariu (LICs) enxertos na rede Natura 2.000. Esta categoría de protección permite-yos a los llugares protexíos contar con llinies d'ayuda específiques empobinaes a garantizar el desarrollu sostenible d'esos llugares. Dende 1997 Asturies tenía 35 LICs, anque la propuesta del Principáu a la UE remocica bien d'ellos sobre los planeamientos orixinales, xuntando dellos más pequeños n'unidaes mayores hasta quedar nun total de 29, colo que coles 21 entraes nueves que se proponen agora dende la Conseyería de Mediu Ambiente la llista de LICs asturianos pue quedar en 50.

La llista completa colos LICS vieyos modificaos y colos 21 LICs potenciales nuevos espublizóse nel BOPA d'esti 15 d'avientu, entamando asina'l trámite d'información público de la propuesta pa que los colectivos, instituciones y persones interesaes puedan presentar alegaciones o encamientos al proyectu. La propuesta asturiana presenta como LICs nuevos los de los Alcornocales del Navia, la fastera Ayer-L.lena, la Carbayera del Tragamón en Xixón, el paisaxe de les Cuenques Mineres, Meandros del Ñora, Peña Mantega en Xinestaza, el paisaxe de Ribeseya-Tinamayor, la Sierra de la Borbolla y la Sierra del Sueve. Xunta estos, delles turberes, que son la Turbera de la Molina
en Salas, Turbera de las Dueñas en Cuideiru, Turberes de la Garganta en Valgrande. Tamién son candidatos a entrar na rede europea los Yacimientos y Icnites del Altu Navia, la Cuenca del Agüeira, la Cuenca del Altu Narcea, el Rigu Ibias, el Trubia y los ríos Negro y Ayer.