El primer “club de la Comedia” n’asturianu echa a andar

L'Asociación "H.a Xareos" va celebrar el 3 de marzu na Sala Albéniz de Xixón el primer "Certame de monólogu modernu n'asturianu" una iniciativa que pretende ser l'espeyu de la modernización del repertoriu y contestu del tradicional monólogu cómicu n'asturianu. Toño Caamaño, fundador del grupu teatral "nun tris" y que punxo n'escena l'añu pasáu un espectáculu de monólogos contemporáneos escritos por Adolfo Camilo Díaz ye l'intérprete más conocíu pol públicu de los que van participar nel espectáculu, que va contar tamién cola participación d'otru veteranu actor asturianu, Lluis Antón González, y cola estrena de Benxa Pérez, el más mozu de los monologuistes. El grupu folk Tarañu va tocar pa pesllar l'actu.

Ente les últimes novedaes relatives al espectáculu del día 3, ta l'apoyu al eventu de la editorial Trabe, que va patrocinar el sortéu que va tener llugar esi día. D'otra manera, l'asociación cultural H.a Xareos presenta esta selmana la so páxina web, una web cenciella que quier ser puntu d'información y fueya de presentación d'esti y otros eventos qu'organice d'equí en p'alantre esti grupu.

Les entraes, a namás 6 euros, tán yá a la venta en Xixón en Café Trisquel, El Barucu, Llibrería Paradiso, Alborá Llibros, Astur-King Disco-bar y Mavy's Pub. N'Uviéu tán a la venta en Chigre El Naranco y na sede de la Xunta Pola Defensa Llingua Asturiana (Llar Solidariu). Y n'Avilés les entraes tarán a la venta a lo llargo d'esta selmana na Llibreria Seronda. La empresa de creatividá testil publicitaria Publigrafik y Les Noticies patrocinen esta iniciativa que cuenta tamién cola collaboración d'Asturies.com, Televisión Local Xixón (TLG), Xunta Pola Defensa de la Llingua y la Oficina Municipal de la Llingua de Xixón.