El presidente de los llagareros asturianos albidra que'l Gobiernu quier recuperar la llei del alcohol

El presidente de l'Asociación de Llagareros d'Asturies, José María Osoro, declaró ayeri que ye preciso facer un apueste poles midíes educatives y formatives en cuenta de prohibir o penalizar la publicidá del alcohol, refugando la idea del gobiernu, que cuenta con llantar nes etiquetes de les botelles de bebíes alcohóliques avisos asemayaos a los que puen lleese nos paquetes de tabacu, una midida que tamién va funcionar nel Reinu Uníu, Polonia y Francia, onde les botelles van alvertir sobre les consecuencies del so consumu.

Al presidente de los llagareros asturianos, qu'albidra tres d'estes declaraciones un intentu por recuperar la llei del alcohol que'l gobiernu tuvo de retirar, nun-y paez que la propuesta de la ministra de Sanidá, Elena Salgado sía lo más fayadizo nesti momentu y anque camienta que ye "positivo" que se tomen midíes pa rebaxar l'alcoholismu ente la mocedá, el representante del sector esplicó qu'estes midíes nun puen centrase namás na propaganda y que ye preciso, en cuenta d'ello, sorrayar estes cuestiones na educación.