El presidente de l’Asociación de Memoria Histórica Asturiana diz que la Llei de Memoria histórica nun ye abondo

El presidente de l'Asociación de Memoria Histórica Asturiana, Víctor Luis Álvarez, refugó ayeri la propuesta de llei de Memoria histórica del Gobiernu de José Luis Rodríguez Zapatero y Izquierda Xunida, por considerar que nun ye abondo. Según esplicó Álvarez, la llei propuesta merez-y una "opinión negativa" en cuantes que nun anula los xuicios, nun plantea subvenciones pa la busca de desapaecíos, nin reconoz a les víctimes xurídicamente como víctimes, "que ye lo más importante" sorrayó, xunto cola devolución de les espropiaciones que se fexeron na dictadura franquista, que tampoco apaez na redacción de la llei.



P'Álvarez la llei "nun cumple les declaraciones de Derechos Humanos, nin les resoluciones de Nuremberg no tocante a España, nin les de les Naciones Uníes". Por ello, pa l'asociación asturiana y les demás de toa España que firmaron el "Manifiestu de Leganés" que reivindicaba la creación d'esta llei, el siguiente pasu va ser llevar el casu a los Tribunales Internacionales, una demanda que va tomar tiempu pero que "vamos ganar porque'l derechu internacional ye clarísimu en casos como la dictadura franquista", esplicó Álvarez que ve una contradicción en que la llei declare illexítimos los tribunales franquistes pero nun anule los sos xuicios. Ello ye que l'Asociación perita ente 5.000 y 6.000 los desapaecíos na guerra y posguerra n'Asturies, una cantidá a la qu'hai qu'amestar los afusilaos por conseyos de guerra illegales, a los qu'afectaría l'anulación de sentencies. Álvarez pidió que s'aplique n'España una llei asemeyada a la que funciona n'Alemaña, que tamién prohibe los símbolos nazis, y esplicó qu'hai mayoría p'aprobala, amestando en referencia a la postura del PP "que quien se declare favorable a la dictadura que lo diga".