El presidente de la CHN descarta l'embalse pal Altu Ayer

El presidente de la Confederación Hidrográfica del Norte (CHN), Jorge Marquínez, participó ayeri nun congresu sobre l'agua que se celebra en Mieres. Ellí confirmó que'l Ministeriu de Mediu Ambiente va disponer a últimos d'esti añu de los primeros datos pa determinar si l'aprovechamientu de los acuíferos y manantiales asturianos ye alternativa como pa dar agua abondo p'Asturies y asina poder dexar pa prau la construcción del embalse de Caliao, polémica infraestructura prevista nel altu Nalón.

Anque Caliao sigue n'estudiu y el mesmu Marquínez reconoció que Caliao ye "una infraestructura qu'asegura gran cantidá d'agua de calidá y a baxu coste" el titular de la CHN pidió esperar a que rematen tolos estudios pa saber qué decisión ye la más acertada. D'otra manera, Marquinez descartó la construcción d'otru de los banzaos previstos p'Asturies, el del Altu Ayer. El presidente de la CHN esplicó qu'esta obra diba tener un altu coste, que diba ser poco competitiva y que namás diba furnir d'agua a usuarios puntuales.