El PP asturianu diz que nun va negociar la reforma del estatutu hasta que s’aclarien les d’Euskadi y Cataluña

El PP asturianu presentó ayeri n'Asturies la so campaña estatal "derechu a opinar tenemos toos" na que pide un referéndum pa garantizar "la unidá nacional d'España" cola reforma estatutaria catalana de fondu. El representante del PP anunció otra vuelta más que'l PP asturianu, acordies col restu del estáu, nun va negociar nenguna reforma estatutaria hasta que s'aclarien les d'Euskadi y Cataluña "que pretenden francer la Constitución española".

La entruga que'l PP quier que se lleve a consulta popular diz "abúlta-y conveniente qu'España siga siendo una única nación na que tolos sos ciudadanos sían iguales en derechos, obligaciones y nel accesu a les prestaciones públiques?". La organización política da anuncia de que pa llevar alantre esta campaña, que'l diputáu popular Ovidio Sánchez atalanta que van soscribir "munchos socialistes", van llantar puestos y meses en cais y mercaos de toa Asturies.

El PP asturianu mueve asina tola so maquinaria pa una campaña d'ámbitu estatal que los dirixentes del partíu, encabezaos pol so secretariu xeneral Mariano Rajoy, lleven promoviendo dende va unos díes p'acá y que los responsables populares n'Asturies aseguren que va paralizar la so participación na reforma del estatutu asturianu.