El PP asturianu defende a Pérez-Espinosa pa candidata

La Dirección del PP d'Asturies xunto con presidentes de les Xuntes Llocales acordó esti vienres por unanimidá proponer a la conceyala del Conceyu d'Uviéu, Isabel Pérez-Espinosa como cabeza de llista per Asturies nes elecciones autonómiques.

L'alcuerdu prodúxose tres una xunta que se celebró nel Conceyu d'Uviéu y suscríbenlu'l presidente del PP d'Asturies, Ovidio Sánchez, y los presidentes de les Xuntes Llocales d'Ayande, Ayer, Avilés, Bimenes, Bual, Cabranes, Casu, Colunga, Cuideiru, El Franco, Grandas de Salime, Xixón, Gozón, Eilao, Illas, Llaviana, L.lena, Llanera, Mieres, Nava, Navia, Noreña, Uviéu, Parres, Pravia, Santu Adrianu, Santalla d'Ozcos, Samartín del Rei Aurelio, Sariegu, Tinéu, A Veiga, Vilanova d'Ozcos y Villaviciosa; asina como los voceros de Samartín d'Ozcos y Taramundi.

Tamién el presidente de Nueves Xeneraciones, Pablo Álvarez-Pire, y el presidentes de Nueves Xeneraciones d'Ayer, Avilés, Castropol, Xixón, Llanera, Samartín del Rei Aurelio, Navia y Uviéu.

Según señalaron al traviés del documentu nel que plasmaron l'acuerdu, Pérez-Espinosa representa "fielmente" al PP d'Asturies, onde lleva afiliada más de 25 años y onde desempeñó "con brillantez" responsabilides  orgániques y institucionales, siendo ocho años diputada n’Asturies, cuatro d'ellos como Vicepresidenta de la Xunta Xeneral del Principáu d'Asturies, y los últimos siete años Teniente Alcalde del Conceyu d'Uviéu.

Natural de Xixón, onde reside la so familia, y llicenciada en Derechu, señalen que ye "una muyer moza de 43 años", de "probada llealtá" al PP y con una trayectoria institucional "intachable", que representa la vocación renovadora" del Partíu Popular.

Tamién s'acordó esti vienres establecer como criteriu pa la composición del conxuntu de la candidatura "la representación territorial proporcional de les distintes xuntes llocales, de manera que lexítima y democráticamente lo escoyeron los afiliaos del PP".

Va tratase asina d'una candidatura "con munches posibilidaes de ganar, que se va enfrentar con éxitu al PSOE en mayu del 2011" y una llista ellaborada dende la unidá" del partíu, "integrando a toles xuntes llocales y a la dirección rexonal, que va ofrecer a la sociedá asturiana lo meyor del PP".

Apoyu “incondicional” a Rajoy
A lo último, los firmantes manifestaron el so apoyu "incondicional" y la so "llealtá política" a Mariano Rajoy y a la Dirección Estatal del PP. "Los firmantes d'esti acuerdu tuvimos nel Congresu de Valencia apoyando a Mariano Rajoy y dende entós ficímoslo sin fisures y vamos siguir faciéndolo fielmente nel futuru", recordaron.