El PP apoya’l presupuestu de la FSA-PSOE

El Conseyu de Gobiernu aprobó un presupuestu pal 2015 de 3.959 millones d’euros, un 1,2 por cientu más qu’esti añu, cuando l'Executivu de Javier Fernández tuvo que prorrogar l’anterior al nun llegar a alcuerdos col restu de grupos. Nesta ocasión, les cuentes de la FSA-PSOE tienen l’apoyu del Partido Popular (PP) tres aceptar una rebaxa fiscal.

Mercedes Fernández, presidenta popular n’Asturies, anunció ayeri’l sofitu a los presupuestos que güei aprobó’l Conseyu de Gobiernu previu pasu a la tramitación na Xunta Xeneral. Les cuentes ascienden a 3.959 millones de euros, siendo’l gastu social de 2.649 millones, lo que supón un 67 por cientu del total: 1.469 van pa Sanidá (un 38 por cientu del total), 741 a Educación (19) y 381 a Bienesta Social (10). Mentes, la inversión algama los 330 millones.

El pautu ente les dos formaciones pasa por una rebaxa fiscal de dos puntos nel primer tramu del IRPF cola creación d’un tramu nuevu de tributación de 0 euros hasta 12.450 con un tipu marxinal del 10 por cientu. Según Dolores Carcedo, conseyera de Facienda y Sector Públicu, esta midida beneficiará sobre manera a les rentes medies y baxes. L’alcuerdu tamién contempla deducciones fiscales nos gastos n’escueles de 0 a 3 años y na merca de llibros de testu.

El presidente d’Asturies, na so intervención tres el Conseyu de Gobiernu, señaló que “l’alcuerdu presupuestariu beneficia a Asturies” y apuntó que’l PP foi la única formación predispuesta a pautar les cuentes –yá l’añu pasáu apoyó los créditos estraordinarios propuestos pol Gobiernu–. Pela so parte, la líder popular afirmó ayeri cuando anunció’l sofitu al prespuestu que’l pasu dau pol so partíu yera “un exerciciu de responsabilidá”. El restu de grupos de la oposición sospechen qu’hai un alcuerdu políticu ente FSA-PSOE y PP que va más allá de l’aprobación de les cuentes pal 2015, dalgo que dambos nieguen.

Na semeya, Javier Fernández y Carcedo tres el Conseyu de Gobiernu.