El PP anecia en nun entrar al procesu de reforma del estatutu

El Partíu Popular d'Asturies afitóse esti fin de selmana na so intención de nun participar nel procesu de reforma del Estatutu d'Autonomía d'Asturies. El dirixente popular Ovidio Sánchez dixo al traviés d'un comunicáu que la reforma namás respuende a los intereses del presidente asturianu y que "nun ye urxente nin se precisa al nun haber demanda social nenguna que la esixa"

Pa los populares el PSOE cola so priesa "namás intenta esmucir la so mala xestión y incapacidá pa gobernar Asturies, consciente de que los verdaderos problemes de los asturianos son otros, como'l desarrollu económicu o la creación d'emplegu". Pa los populares asturianos esiste amás otra razón de fondu pa qu'Areces quiera emprimar la reforma estatutaria, y ella nun ye otra que la de "sirvir a Zapatero y a los sos socios separatistes con una maniobra de distracción como ye la d'intentar que paeza, cola reforma del estatutu asturianu, que les reformes catalana o vasca nun tienen importancia nenguna nin dañen los intereses de tolos españoles".