El PP acusa al PSOE de facer cargos n’alministración a costafecha pa los sos “camaraes”

Los diputaos del Grupu Parlamentariu del Partíu Popular, na Xunta Xeneral del Principáu, Ramón García Cañal y José Agustín Cuervas-Mons, denunciaron ayeri en rueda prensa'l "escesivu incrementu" d'altos cargos nel Gobiernu asturianu y aseguraron que "nestos momentos l'Executivu del Principáu ye al PSOE lo que l'INEM a los paraos, porque la estructura creada pa lo que sirve ye pa colocar a los camaraes del partíu".


"Esti crecimientu escesivu de chiringuitos del PSOE supón qu'ente contratos d'alta dirección, altos cargos y personal eventual de gabinete hai más de 300 camaraes socialistes que cuesten a los asturianos más de 18 millones d'euros al añu", esplicó García Cañal.
Nesti sentíu los diputaos 'populares' punxeron sobre la mesa cifres y aseguraron que "lo cierto ye que nel añu 2003 había n'Asturies 79 altos cargos y na estructura aprobada pol Gobiernu en xunetu y asgostu del 2007 pasaron a 94, ye decir, 15 altos cargos más".
Amás matizó que los contratos d'alta dirección --nomamientos que fai'l Gobiernu como los del Serviciu de Salú del Principáu nel ERA o n'empreses d'entidaes públiques-- pasaron de los 13 en 2003 a los 36 de l'actual estructura, colo cual "pasóse de los 92 puestos del 2003 a los 130 del 2007, un incrementu del 41 por cientu".


"Ye falso dafechu que la estructura de Gobiernu nun suponga un incrementu nel númberu de puestos d'altos cargos respecto a l'anterior llexislatura y la realidá de la situación descúbrese mirando los Boletines Oficiales del Principáu", dixo Canal.
El diputáu 'popular' esplicó que dalgo similar pasa col personal eventual de gabinetes que se contrata nes conseyeríes y que nun apaez publicáu nel BOPA. Según Cañal nel 2003 figuraben 47 persones contrataes como personal eventual de gabinete y nel 2007, enantes del nuevu gobiernu "ya se tresformaren en 64 places".


A toes este cifres el PP afirmó qu'ahi que sumá-yos los 105 cargos d'alta dirección creaos nel Serviciu de Salú del Principáu, asina como los contratos de personal de les empreses públiques, fundaciones y sociedaes públiques participaes minoritariamente pol Principáu.
"Ente toos estos organismos sumen más de 1.700 trabayadores públicos que na so mayoría nun tán sometíos a los sistemes de selección de personal siguíos por cualquier tipu d'Alministración, pero que pasen a ser indefiníos", dixo Cañal.
Los populares aseguraron amás que como-yos paez "escesiva" la fiscalización y el control exixíu a l'Alministración, "los socialistes nun duden en crear cada vez más empreses públiques y fundaciones y ponen al mandu de les mesmes a los sos camaraes y al final van acabar cayendo otra vez na corrupción".
"Nun rinden cuentes nin tán sometíos nin al Parlamentu nin a la fiscalización previa del Gobiernu", dixo Cuervas-Mons que manifestó que'l númberu de Fundaciones incrementóse enforma nos últimos años y que'l pagu del sueldu de los altos cargos supón 18 millones d'euros anuales.